Toh India Ho Tum

Laal batti pe na rukne wali tumhaari gaadii ko, jab kali billi ke saamne rokte ho, Toh India Ho Tum

Bekaar movies ko multiplex mein dekhkar 100 crore club tak pahunchaake, raaste par sabziyaan lete waqt 5 rupaye dene mein naraaz ho jaate ho, Toh India Ho Tum

Phone pe screenguard crack hote hi badalwaate ho, par bike bina helmet ke chalaate ho, Toh India Ho Tum

Saal mein do din maze se loud speaker pe desh bhakti ke gaane bajaate ho, par cinema haal mein national anthem pe khade hone se alsaate ho, Toh India Ho Tum

Tinder pe swipe karke apna pyaar khojtey ho, par toote Dil ka ilaaj karaane baba Bangali ke paas jaate ho, toh India ho tum

Kehte ho corruption se desh khokhala ho raha hai, par traffic havaldaar se chootne ke liye hari patti nikaalte ho, Toh India Ho Tum

Swades movie dekh kar India ke liye kuch karne ka plan banaate ho, par agle din office jaake onsite opportunity ke liye manager Ko maska lagaate ho, toh India ho tum

Kehte ho ki apni beti ki kaabiliyat pe bharosa hai tumhein, par uski ki padhai se zyaada uski shaadi ke liye paise bachaate ho, Toh India Ho Tum

Dil se aah toh maatrabhasha mein hi nikalti, par angrezi mein bolne wale ki baat ko zyada mahatva dete ho, Toh India Ho Tum

aatanki hamle ke baad saath mein candle march pe nikalte ho, par Netao ke behkaave mein aakar gairmazhabi logon ko paraaya samajhte ho, Toh India Ho Tum

Jaldi mein ho isliye duniya ko dhakka de ke aage niklte ho, par phir bhi kahin par samay par nahin pahunchte ho, Toh India Ho Tum

Hindi mein gaali dene walon ko aonchi nazar se dekhte ho, par angrezi ke apshabdon ko kehna cool samajte ho, Toh India Ho Tum

Anekta mein ekta ko samvaad mein chipka ke samaaveshi bante ho, par insaaniyat ke naate har insaan ki izzat karna nahin jaante ho, toh India ho tum

Paryatakon (tourists) ko shaan se apne sheher ke monuments ke baare mein bataate ho, par wahan ki deewaron par Apne pyaar ka aelaan kar jaate ho, Toh India Ho Tum

Desh ki har ek buraai ke liye sarkaar ko zimmedaar bataate ho, par sarkaari naukri le liye laar tapkaate ho, Toh India Ho Tum

Apni gaadi chalane ke liye chaalak dasvi paas rakhte ho, par desh chalane wala neta chauthi fail ko chunte ho, Toh India Ho Tum

bharat ke itihaas ka sirf bakhaan mat karo, bharatiya kehlane ke kaabil bano
Ignorant banke apne aap ko best mat samjho, doosron se seekh kar behtar bano
Sirf jaan gawaana hi deshbhakti nahin doston, Apne har karm se India Banaa Rahe Ho Tum
Agar excellence ke jazbe se apna hunar taraashte ho, Toh India Ko behtar Bana Rahe Ho Tum